ଓରମାସ ପକ୍ଷରୁ ‘ରଙ୍ଗୋତ୍ସବ-୨୦୨୬’...
ଓରମାସ ପକ୍ଷରୁ ‘ରଙ୍ଗୋତ୍ସବ-୨୦୨୬’...
ସୁରକ୍ଷିତ ହୋଲି, ନାରୀ ସଶକ୍ତିକରଣ ଓ ସ୍ଥାୟୀ ବଜାର ସୃଷ୍ଟି ପାଇଁ ଅଭିନବ ପ୍ରୟାସ
ପ୍ରାକୃତିକ ରଙ୍ଗ ବ୍ୟବହାର କରି ଆମେ ସୁରକ୍ଷିତ ଓ ସାର୍ଥକ ହୋଲି ପାଳନ କରିପାରିବା: ମନ୍ତ୍ରୀ ଶ୍ରୀ ରବି ନାରାୟଣ ନାଏକ
ଗ୍ରାମୀଣ ମହିଳା ଉଦ୍ୟୋଗୀଙ୍କୁ ଆଧୁନିକ ବଜାର ସହ ଯୋଡ଼ିବା ଆମର ମୁଖ୍ୟ ଲକ୍ଷ୍ୟ: ସିଇଓ ଡଃ ମୋନିକା ପ୍ରିୟଦର୍ଶିନୀ
ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନସ୍ଥ ଓଡ଼ିଶା ଗ୍ରାମ୍ୟ ଉନ୍ନୟନ ଓ ବିପଣନ ସମିତି (ଓରମାସ) ପକ୍ଷରୁ ସ୍ଥାନୀୟ ଏସଆଇଆରଡି (SIRD) କ୍ୟାମ୍ପସଠାରେ ‘ରଙ୍ଗୋତ୍ସବ-୨୦୨୬’ ଶୁଭାରମ୍ଭ ହୋଇଯାଇଛି।
ସୁରକ୍ଷିତ ଓ ପରିବେଶ ଅନୁକୂଳ ହୋଲି ପାଳନକୁ ପ୍ରୋତ୍ସାହିତ କରିବା ସହ ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ମାନଙ୍କୁ ଏକ ସ୍ଥାୟୀ ବଜାର ଯୋଗାଇଦେବା ଏହି ସ୍ୱତନ୍ତ୍ର କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ।
ଏହି ମେଳାରେ କେବଳ ପ୍ରାକୃତିକ ରଙ୍ଗ ନୁହେଁ, ବରଂ ଓଡ଼ିଶାର ପାରମ୍ପରିକ ସ୍ୱାଦିଷ୍ଟ ଖାଦ୍ୟ, ସୂକ୍ଷ୍ମ ହସ୍ତଶିଳ୍ପ ଏବଂ ହାତତିଆରି ଗୃହଉପକରଣ ସାମଗ୍ରୀ ପରି ଅନେକ ଗ୍ରାମୀଣ ଉତ୍ପାଦର ସମ୍ଭାର ଦେଖିବାକୁ ମିଳୁଛି।
ଏହି ଅବସରରେ ଗ୍ରାମ୍ୟ ଉନ୍ନୟନ, ପଞ୍ଚାୟତିରାଜ ଓ ପାନୀୟ ଜଳ ମନ୍ତ୍ରୀ ଶ୍ରୀ ରବି ନାରାୟଣ ନାଏକ ଏହି ପ୍ରୟାସକୁ ସ୍ୱାଗତ କରି କହିଛନ୍ତି "ରଙ୍ଗୋତ୍ସବ ହେଉଛି ସୁରକ୍ଷିତ ରଙ୍ଗ ଓ ନାରୀ ସଶକ୍ତିକରଣର ଏକ ସୁନ୍ଦର ସମନ୍ୱୟ। ଏସଏଚଜି (SHG) ମହିଳାମାନଙ୍କ ଦ୍ୱାରା ପ୍ରସ୍ତୁତ ପ୍ରାକୃତିକ ରଙ୍ଗ ବ୍ୟବହାର କରି ଆମେ ପରିବେଶକୁ ସୁରକ୍ଷିତ ରଖିବା ସହ ଗ୍ରାମୀଣ ଅର୍ଥନୀତିକୁ ସମର୍ଥନ କରିପାରିବା।" ସମସ୍ତେ ସ୍ଥାନୀୟ ଉତ୍ପାଦକୁ ଆପଣାଇବା ପାଇଁ ସେ ଆହ୍ୱାନ ଦେଇଛନ୍ତି।
ଓରମାସର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ଡଃ. ମୋନିକା ପ୍ରିୟଦର୍ଶିନୀ କହିଛନ୍ତି, "ରଙ୍ଗୋତ୍ସବ ଗ୍ରାମୀଣ ଓଡ଼ିଶାର ନାରୀ ଉଦ୍ୟୋଗୀଙ୍କ ଦକ୍ଷତାକୁ ପ୍ରତିଫଳିତ କରୁଛି। ସେମାନଙ୍କୁ ଆଧୁନିକ ବଜାର ସହ ଯୋଡ଼ିବା ଏବଂ ସେମାନଙ୍କ ପରିଶ୍ରମକୁ ଏକ ସ୍ୱତନ୍ତ୍ର ପରିଚୟ ଦେବା ପାଇଁ ଓରମାସ ପ୍ରତିବଦ୍ଧ।
ଉନ୍ନତ ମାନର ପ୍ୟାକେଜିଂ ଓ ବ୍ରାଣ୍ଡିଂ ମାଧ୍ୟମରେ ଏହି ଉତ୍ପାଦଗୁଡ଼ିକୁ ମୁଖ୍ୟ ବଜାରରେ ପ୍ରତିଷ୍ଠିତ କରାଯାଉଛି।"
ପ୍ରାକୃତିକ ରଙ୍ଗ (ହରବାଲ ଗୁଲାଲ): ଗଞ୍ଜାମ ଜିଲ୍ଲାର RIPC ସହାୟତାରେ ଏସ୍.ଏଚ୍. ଜି. ମହିଳାମାନଙ୍କ ଦ୍ୱାରା ହଳଦୀ, ବିଟରୁଟ୍ ଏବଂ ଫୁଲ ପରି ପ୍ରାକୃତିକ ଉପାଦାନରୁ କେମିକାଲ୍ ମୁକ୍ତ ହର୍ବାଲ୍ ଗୁଲାଲ୍ ପ୍ରସ୍ତୁତ କରାଯାଇଛି, ଯାହା ଚର୍ମ ଓ ପରିବେଶ ପାଇଁ ସମ୍ପୂର୍ଣ୍ଣ ସୁରକ୍ଷିତ।
ଗ୍ରାମୀଣ ଉତ୍ପାଦ: ମେଳାରେ ପାରମ୍ପରିକ ଓଡ଼ିଆ ଖାଦ୍ୟ, ହସ୍ତଶିଳ୍ପ ଏବଂ ହାତତିଆରି ଘରକରଣା ସାମଗ୍ରୀ ଉପଲବ୍ଧ ହେଉଛି।
ସିଧାସଳଖ ବଜାର: ଏହି ପ୍ଲାଟଫର୍ମ ମାଧ୍ୟମରେ ଗ୍ରାମୀଣ ମହିଳାମାନେ କୌଣସି ମଧ୍ୟସ୍ଥି ବିନା ସିଧାସଳଖ ସହରୀ ଗ୍ରାହକଙ୍କ ନିକଟରେ ପହଞ୍ଚି ପାରୁଛନ୍ତି।
ଏହି ମେଳା ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ଭୁବନେଶ୍ୱର ୟୁନିଟ୍-୮ ସ୍ଥିତ ଏସ୍.ଆଇ.ଆର୍.ଡି କ୍ୟାମ୍ପସରେ ଚାଲିବ।
ନାଗରିକମାନେ ଏଠାରୁ ପ୍ରାକୃତିକ ହୋଲି ରଙ୍ଗ ଓ ପାରମ୍ପରିକ ସାମଗ୍ରୀ କ୍ରୟ କରି ଗ୍ରାମୀଣ ସମୁଦାୟକୁ ସମର୍ଥନ କରିବା ପାଇଁ ଓରମାସ ପକ୍ଷରୁ ଅନୁରୋଧ କରାଯାଇଛି।
ଏହି ପ୍ରୟାସ ଓଡ଼ିଶାର ପରମ୍ପରାକୁ ଆଧୁନିକ ବଜାରରେ ପହଞ୍ଚାଇବା ସହ ନାରୀମାନଙ୍କୁ ଆର୍ଥିକ ଭାବେ ସ୍ୱାବଲମ୍ବୀ କରିବା ଦିଗରେ ଏକ ଦୃଢ଼ ପଦକ୍ଷେପ।
