ଆଗାମୀ ଦିନରେ ନବୀନ ଧରିବେ ଅସ୍ତ୍ର ମୋହନ ବିରୁଦ୍ଧରେ...
ମୋହନ ସରକାରଙ୍କ ବିରୋଧରେ ଶାଣିତ ସ୍ବର ଉତ୍ତୋଳନ କରିବେ ବିଜେଡି ସୁପ୍ରିମୋ
ପଞ୍ଚାୟତ ନିର୍ବାଚନ ପୂର୍ବରୁ ରାଜ୍ୟ ବିଜେପି ସରକାର ବିରୋଧରେ ଆକ୍ରମଣାତ୍ମକ ରଣନୀତି ଆପଣାଇବାକୁ ଯାଉଛି ବିଜେଡି ।
ମୋହନ ମାଝୀ ସରକାରଙ୍କୁ ଘେରିବା ପାଇଁ ଦଳ ପକ୍ଷରୁ ରଣନୀତି ପ୍ରସ୍ତୁତ ହୋଇଛି।
ଗତକାଲି ଅନୁଷ୍ଠିତ ପିଏସି ବୈଠକରେ ଏନେଇ ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଥିବା ଜଣାପଡ଼ିଛି ।
MMDR ସଂଶୋଧନ ବିଲ୍, ଚାଷୀଙ୍କ ସମସ୍ୟା ଓ ବହି ବିଭ୍ରାଟ ଭଳି ପ୍ରସଙ୍ଗକୁ ନେଇ ଆନ୍ଦୋଳନ କରିବାକୁ ବିଜେଡି ଯୋଜନା କରିଛି ।
ବିଧାନସଭାରେ ପ୍ରସଙ୍ଗ ଉଠାଇବା ସହ ଏହାକୁ ନେଇ ଲୋକଙ୍କ ପାଖକୁ ଯିବାକୁ ଦଳ ନିଷ୍ପତ୍ତି ନେଇଛି ।
MMDR ସଂଶୋଧନ ବିଲ୍ ସଂସଦରେ ପାରିତ ହେବା ପରେ ଏହାକୁ ନେଇ ପ୍ରଶ୍ନ ଉଠାଇଛି ବିଜେଡି ।
ଏହା ଯୋଗୁଁ ଓଡ଼ିଶା ଆର୍ଥିକ କ୍ଷତି ସହିବ ବୋଲି ଦଳ ଦାବି କରିଛି । ଏନେଇ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଚିଠି ଲେଖି ସର୍ବଦଳୀୟ ବୈଠକ ଡାକିବାକୁ ପ୍ରସ୍ତାବ ଦେଇଛନ୍ତି ।
୨୦୨୪ ନିର୍ବାଚନ ପରେ ନବୀନ ପଟ୍ଟନାୟକ କେନ୍ଦ୍ରର ମୋଦୀ ସରକାର ବିରୋଧରେ ସେଭଳି ଆକ୍ରମଣାତ୍ମକ ଭୂମିକା ନେଇନଥିବା ବିଜେଡି ବିରୋଧୀଙ୍କ ଅଭିଯୋଗ ରହିଛି । ଏପରିକି ବିଭିନ୍ନ ବିରୋଧୀ ଦଳର ପ୍ରତିବାଦରେ ମଧ୍ୟ ବିଜେଡି ସାମିଲ ହୋଇନଥିଲା ।
କିନ୍ତୁ ଏବେ ରାଜ୍ୟରେ ମୋହନ ସରକାରଙ୍କ ବିରୋଧରେ ନବୀନଙ୍କ ସ୍ବର ଶାଣିତ ହୋଇଛି ।
ଆଗକୁ ପଞ୍ଚାୟତ ନିର୍ବାଚନ ଥିବାରୁ ସରକାର ବିରୋଧରେ ଜନମତ ତିଆରି କରିବାକୁ ବିଜେଡି ଜୋରଦାର ଅଭିଯାନ ଚଳାଇବାକୁ ପ୍ରସ୍ତୁତ ହେଉଥିବା ଚର୍ଚ୍ଚା ହେଉଛି ।
