ବିଧାନସଭା ବଜେଟ ଅଧିବେଶନ ପାଇଁ ହୋଇପାରେ ହଟ ଚମଟ !
ବିଧାନସଭା ବଜେଟ ଅଧିବେଶନ ପାଇଁ ହୋଇପାରେ ହଟ ଚମଟ !
୧୬ରେ ସର୍ବଦଳୀୟ ବୈଠକ, ସରକାରଙ୍କୁ ଘେରିବାକୁ ବିରୋଧୀଙ୍କ ଚୂଡାନ୍ତ ରଣନୀତି
ଧାନ ମଣ୍ଡି, ମହାନଦୀ ଜଳ, ମୋଟରଯାନ ପ୍ରଦୂଷଣ ପ୍ରମାଣପତ୍ର (ପିୟୁସିସି), ଆଇନଶୃଙ୍ଖଳା ଓ ଏସଆଇଆର୍ ପର୍ଯ୍ୟନ୍ତ ଅନେକ ପ୍ରସଙ୍ଗ.. ପ୍ରସ୍ତୁତକରି ରଖିଲେଣି ବିରୋଧୀ ଦଳ
ବିଧାନସଭାର ଆଗାମୀ ବଜେଟ ଅଧିବେଶନକୁ ନେଇ ପ୍ରସ୍ତୁତିରେ ଲାଗି ପଡ଼ିଛନ୍ତି ବିରୋଧୀ ଦଳ ଓ ଶାସକ ଦଳ ।
ବିଧାନସଭାର ବଜେଟ ଅଧିବେଶନ ଆରମ୍ଭ ହେବ ଆସନ୍ତା ୧୭ରୁ । ବିଧାନସଭାର ଏ ଅଧିବେଶନ ପୂର୍ବରୁ ରାଜ୍ୟ ରାଜନୀତି ପାଣିପାଗରେ ଅନେକ ହଟ ଚମଟ ପ୍ରବେଶ କରିସାରିଛି ।
ଗଲା କିଛିଦିନ ଭିତରେ ବିଜେଡିର ଅନେକ ତୃଣମୂଳ ସ୍ତର ନେତାଙ୍କୁ ବିଜେପି ନିଜ ଶିବିରକୁ ନେଇ ସାରିଛି ।
ବିଜେଡି ମଧ୍ୟ ସରକାର ବିରୋଧରେ ଲଗାତାର ଆକ୍ରମଣାତ୍ମକ ବୟାନବାଜି ଜାରି ରଖିଛି । କଂଗ୍ରେସ ମଧ୍ୟ ବଳ ବଢ଼ାଇବାକୁ ଲାଗି ପଡ଼ିଛି ।
ସବୁ ଦଳର କିଛି ନା କିଛି ଦଳ ବଦଳ କରି ସାରିଲେଣି( ଡିଆଁ ଡେଇଁ)
ବିଧାନସଭା ଅଧିବେଶନକୁ ସୁରୁଖୁରୁରେ ଚଳାଇବା ପାଇଁ ସବୁ ଦଳର ସହଯୋଗ ଲୋଡ଼ିଛନ୍ତି ବାଚସ୍ପତି ସୁରମା ପାଢୀ ।
ଏଥିପାଇଁ ଆସନ୍ତା ୧୬ ତାରିଖ ଦିନ ସାଢେ ୧୧ଟାରେ ବାଚସ୍ପତିଙ୍କ ଅଧ୍ୟକ୍ଷତାରେ ସର୍ବଦଳୀୟ ବୈଠକ ଅନୁଷ୍ଠିତ ହେବ ।
କେନ୍ଦ୍ର ବଜେଟ ଓ ରାଜ୍ୟ ବଜେଟରୁ ଦୋଷ ଦୁର୍ବଳତା କାଢ଼ି ସରକାରଙ୍କୁ ଘେରିବେ ବିରୋଧୀ ଦଳ ।
ମହାନଦୀକୁ ପ୍ରମୁଖ ପ୍ରସଙ୍ଗ କରିବାକୁ ବିଜେଡି ବିଧାନସଭା ପୂର୍ବରୁ ହିଁ ସରକାରଙ୍କ ଆଭିମୁଖ୍ୟ ନେଇ ପ୍ରଶ୍ନ ଉଠାଇଛି ।
ବିଜେଡିର ବରିଷ୍ଠ ବିଧାୟକ ଡ. ଅରୁଣ କୁମାର ସାହୁ କହିଛନ୍ତି, ସରକାରଙ୍କୁ ଘେରିବା ପାଇଁ ଅନେକ ପ୍ରସଙ୍ଗ ରହିଛି ।
ଧାନ ମଣ୍ଡିରେ ଚାଷୀ ନିର୍ଯାତିତ ହେଉଛି । କଟନ ଛଟନୀ ନାଁରେ ଚାଷୀଙ୍କୁ ଶୋଷଣ କରାଯାଉଛି ।
ସେପଟେ ମହାନଦୀ ପ୍ରସଙ୍ଗ ନେଇ ସରକାରଙ୍କ ଆଭିମୁଖ୍ୟ ଅସ୍ପଷ୍ଟ ରହିଛି ।
କୋଟିଆ, ପୋଲାଭରମ ଏଥର ବି ପ୍ରସଙ୍ଗ ହେବ ।
ରାଜ୍ୟରେ ଆଇନଶୃଙ୍ଖଳା ବଡ଼ ସମସ୍ୟା ହୋଇଛି ।
୪ ମାସ ହେବ ଲୋକଙ୍କୁ ଭତ୍ତା ମିଳୁନି । ଗାଁ ଗାଁରେ ବିକାଶ କାମ ବନ୍ଦ ପଡ଼ିଛି ।
ମୋଟରଯାନ ପ୍ରଦୂଷର ପ୍ରମାଣପତ୍ର (ପିୟୁସିସି) ଯନ୍ତ୍ରଣା ବି ଉପସ୍ଥାପନ କରାଯିବ ।
ଏ ସବୁ ପ୍ରସଙ୍ଗ ଉଥାପନ କରି ବିଜେଡି ଦଳ ସରକାରଙ୍କୁ ହରଡ଼ ଘଣାରେ ପକେଇ ପାରେ |
କଂଗ୍ରେସ ବିଧାୟିକା ସୋଫିଆ ଫିର୍ଦ୍ଦୋସ କହିଛନ୍ତି, ଚାଷୀ ସମସ୍ୟା ପ୍ରମୁଖ ପ୍ରସଙ୍ଗ । ମଣ୍ଡି ସମସ୍ୟା ନେଇ କଂଗ୍ରେସ ସ୍ୱର ଉଠାଇବ ।
ଏହାବାଦ ମନରେଗା ବନ୍ଦ ହେବା ନେଇ କଂଗ୍ରେସ ଦୃଢ଼ ସ୍ୱର ଉପସ୍ଥାପନ କରିବ । ନାରୀ ନିର୍ଯାତନା ବୃଦ୍ଧି ଉଦବେଗର ବିଷୟର ହୋଇଛି । ଆଇନଶୃଙ୍ଖଳା ଓ ବିଜୁଳି ସମସ୍ୟା ମଧ୍ୟ ପ୍ରମୁଖ ପ୍ରସଙ୍ଗ ରହିଛି ।
ଆସନ୍ତା ୧୬ ତାରିଖରେ କଂଗ୍ରେସ ବିଧାୟକ ଦଳ ବୈଠକରେ ବିଧାନସଭା ନେଇ ରଣନୀତି ଚୂଡ଼ାନ୍ତ କରିବ ।
ବିରୋଧୀ ଦଳକୁ ମୁକାବିଲା କରିବାକୁ ସରକାର ମଧ୍ୟ ପ୍ରସ୍ତୁତ ରହିଛନ୍ତି ।
ଡବଲ୍ ଇଞ୍ଜିନ ସରକାରରେ ଓଡ଼ିଶାକୁ ମିଳୁଥିବା ଫାଇଦା ଦେଖାଇବ ଶାସକ ଦଳ ।
ଖାଲି ସେତିକି ନୁହେଁ, ମୋଦିଙ୍କ କେନ୍ଦ୍ର ବଜେଟ ଓ ମୋହନ ସରକାରଙ୍କ ରାଜ୍ୟ ବଜେଟରେ ରାଜ୍ୟବାସୀ କିଭଳି ଉପକୃତ ହେବେ, ତା’ର ସଫଳତା ବଖାଣିବେ ସରକାର |
ରେଳ ବଜେଟରୁ ଓଡ଼ିଶାକୁ ମିଳୁଥିବା ପ୍ୟାକେଜ ଓ ପ୍ରକଳ୍ପର ଦସ୍ତାବିଜ ମଧ୍ୟ ଥୋଇବେ ।
ସରକାରୀ ଦଳ ଉପମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସ କହିଛନ୍ତି, ବିରୋଧୀ ଦଳ ବିରୋଧ କରିବେ, ଅନେକ ପ୍ରସଙ୍ଗ ଉଠାଇବେ । ହେଲେ ବିରୋଧୀ ଦଳର ସବୁ ପ୍ରଶ୍ନର ଉତ୍ତର ଦେବାକୁ ସରକାର ପ୍ରସ୍ତୁତ ଅଛନ୍ତି ।
ଧାନ ବାବଦରେ ଅଧିକ ମୂଲ୍ୟ ମିଳୁଥିବାରୁ ରାଜ୍ୟରେ ଧାନ ଚାଷୀଙ୍କ ଭିତରେ ଆଗ୍ରହ ବଢ଼ିଯାଇଛି । ଚାଷୀଙ୍କ ଆୟ ବଢ଼ିଛି
ଅପରାଧ ବିରୋଧରେ ସରକାର ଶୂନ୍ୟ ସହନଶୀଳ ନୀତି ଆପଣାଇଛନ୍ତି ।
ଯାହା ବି ପ୍ରସଙ୍ଗ ଆସିବ, ତା’ର ଠିକଣା ଜବାବ ଦିଆଯିବ । ଏଭଳି ଟକରା ଟକରି ଭିତରେ ବିଧାନସଭାରେ ଏଥର କିଛି ନୂଆ ସ୍ଥିତି ଦେଖିବାକୁ ମିଳିପାରେ ।
ବିଜେଡିରୁ ନିଲମ୍ବିତ ହୋଇଥିବା ବିଧାୟକ ଅରବିନ୍ଦ ମହାପାତ୍ର ଓ ସନାତନ ମହାକୁଡ଼ଙ୍କ ଭୂମିକା କ’ଣ ରହିବ ତାହାର ବି ପ୍ରାସଙ୍ଗିକତା ରହିଛି..
ନିଲମ୍ବିତ ବିଧାୟକ କାହା ସହ ସ୍ୱର ମିଶାଇବେ ଓ କାହାକୁ ଟାର୍ଗେଟ କରିବେ, ତାହା ଉପରେ ସାରା ରାଜ୍ୟର ନଜର ରହିବ ।
ସେହିପରି କଂଗ୍ରେସ ରାଜ୍ୟ ନେତୃତ୍ୱ ଓ କିଛି ବିଧାୟକଙ୍କ ଭିତରେ ବିବାଦ ଲାଗି ରହିଥିବା ଚର୍ଚ୍ଚାର ପ୍ରଭାବ ବିଧାନସଭାରେ ଦେଖିବାକୁ ମିଳି ପାରେ ବୋଲି ଆଶା କରାଯାଉଛି
ଏମିତି ଅନେକ ଦ୍ଵନ୍ଦାତ୍ମକ ପ୍ରସଙ୍ଗ ସରକାରଙ୍କୁ ଅଧିବେଶନ ଚଳେଇବାରେ ଦିଗହରା କରିପାରେ...
