ଫ୍ରାନ୍ସର ଏଭିଆନରେ ଅନୁଷ୍ଠିତ ଜି୭ ଶିଖର ସମ୍ମିଳନୀରେ "ସମସ୍ତଙ୍କ ପାଇଁ ଏକ ସନ୍ତୁଳିତ, ସହଭାଗୀ ଏବଂ ନିରନ୍ତର ଆର୍ଥିକ ଅଭିବୃଦ୍ଧିର ପୁନରୁଦ୍ଧାର" ଶୀର୍ଷକ ଅଧିବେଶନରେ ପ୍ରଧାନମନ୍ତ୍ରୀଙ୍କ ଉଦବୋଧନ
ଫ୍ରାନ୍ସର ଏଭିଆନରେ ଅନୁଷ୍ଠିତ ଜି୭ ଶିଖର ସମ୍ମିଳନୀରେ "ସମସ୍ତଙ୍କ ପାଇଁ ଏକ ସନ୍ତୁଳିତ, ସହଭାଗୀ ଏବଂ ନିରନ୍ତର ଆର୍ଥିକ ଅଭିବୃଦ୍ଧିର ପୁନରୁଦ୍ଧାର" ଶୀର୍ଷକ ଅଧିବେଶନରେ ପ୍ରଧାନମନ୍ତ୍ରୀଙ୍କ ଉଦବୋଧନ
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଫ୍ରାନ୍ସର ଏଭିଆନରେ ଅନୁଷ୍ଠିତ ଜି୭ ଶିଖର ସମ୍ମିଳନୀରେ "ସମସ୍ତଙ୍କ ପାଇଁ ଏକ ସନ୍ତୁଳିତ, ସହଭାଗୀ ଏବଂ ନିରନ୍ତର ଆର୍ଥିକ ଅଭିବୃଦ୍ଧିର ପୁନରୁଦ୍ଧାର " ଶୀର୍ଷକ ଆଲୋଚନା ଅଧିବେଶନକୁ ସମ୍ବୋଧିତ କରିଛନ୍ତି।
ସାଧାରଣ ଏବଂ ନିରନ୍ତର ଅଭିବୃଦ୍ଧି ଉପରେ ଶିଖର ସମ୍ମିଳନୀର ଗୁରୁତ୍ଵକୁ ପ୍ରଶଂସା କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ, ଯେତେବେଳେ ବିଶ୍ୱ ଅନିଶ୍ଚିତତା ଦ୍ୱାରା ପ୍ରଭାବିତ ହେଉଛି, ସେତେବେଳେ ନିରନ୍ତର ଅଭିବୃଦ୍ଧି ଉପରେ ବାର୍ତ୍ତା ସାରା ବିଶ୍ୱରେ ଅର୍ଥପୂର୍ଣ୍ଣ ଭାବରେ ଗ୍ରହଣ କରାଯିବ। ଅଭିବୃଦ୍ଧି କେବଳ ଜିଡିପି କିମ୍ବା ବାଣିଜ୍ୟ ସଂଖ୍ୟା ନୁହେଁ, ବରଂ ଲୋକଙ୍କ ଅନ୍ତର୍ଭୁକ୍ତି ଏବଂ କଲ୍ୟାଣ ଉପରେ ଏହାର ପ୍ରକୃତ ପ୍ରଭାବ ପଡ଼ିବା ଉଚିତ ବୋଲି ସେ କହିଥିଲେ। ଏହି ପରିପ୍ରେକ୍ଷୀରେ, ସେ "ସବକା ସାଥ୍, ସବକା ବିକାଶ, ସବକା ବିଶ୍ୱାସ, ସବକା ପ୍ରୟାସ" (ସମସ୍ତଙ୍କ ସହିତ, ସମସ୍ତଙ୍କ ପାଇଁ ବିକାଶ, ସମସ୍ତଙ୍କ ବିଶ୍ୱାସ, ଏବଂ ସମସ୍ତଙ୍କ ପ୍ରୟାସ) ନୀତି ଉପରେ ଆଧାରିତ ଭାରତର ଅନ୍ତର୍ଭୁକ୍ତିମୂଳକ ଅଭିବୃଦ୍ଧି କାହାଣୀ ଉପରେ ଆଲୋକପାତ କରିଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତର 'ସମାବେଶୀ ଅଭିବୃଦ୍ଧି' ମନ୍ତ୍ର ଏହାର ଅନ୍ତର୍ଜାତୀୟ ସମ୍ପର୍କକୁ ମଧ୍ୟ ମାର୍ଗଦର୍ଶନ କରେ, ଯାହା 'ଏକ ପୃଥିବୀ, ଏକ ପରିବାର, ଏକ ଭବିଷ୍ୟତ' ନୀତି ସହିତ ଏହାର ଜି୨୦ ଅଧ୍ୟକ୍ଷତା ସମୟରେ ସ୍ପଷ୍ଟ ଭାବରେ ପ୍ରତିଫଳିତ ହୋଇଥିଲା। ସେ ଆହୁରି ଉଲ୍ଲେଖ କରିଥିଲେ ଯେ, ଏହି ସମାନ ଦୃଷ୍ଟିକୋଣ 'ଭାରତ – ମଧ୍ୟପ୍ରାଚ୍ୟ - ୟୁରୋପ ଅର୍ଥନୈତିକ କରିଡର' (ଆଇଏମଇସି) ଧାରଣାକୁ ମାର୍ଗଦର୍ଶନ କରିଥିଲା, ଯାହାର ଲକ୍ଷ୍ୟ ଯୋଗାଣ ଶୃଙ୍ଖଳକୁ ସୁଦୃଢ଼ କରିବା, ନିବେଶ ଏବଂ ନିଯୁକ୍ତି ସୁଯୋଗ ସୃଷ୍ଟି କରିବା ଏବଂ ନବସୃଜନକୁ ପ୍ରୋତ୍ସାହିତ କରିବା। ଦକ୍ଷିଣ ବିଶ୍ଵ ଉପରେ ସଙ୍କଟ ଏବଂ ସଂଘର୍ଷର ପ୍ରତିକୂଳ ପ୍ରଭାବ ଉପରେ ଆଲୋକପାତ କରି, ସେ ସେମାନଙ୍କର ବୋଝକୁ ହ୍ରାସ କରିବା ପାଇଁ ଅନ୍ତର୍ଜାତୀୟ ସଂହତି ପାଇଁ ଆହ୍ୱାନ କରିଥିଲେ। ସେ ପରାମର୍ଶ ଦେଇଥିଲେ ଯେ, ଅନ୍ତର୍ଜାତୀୟ ଆର୍ଥିକ ପ୍ରତିଷ୍ଠାନଗୁଡ଼ିକ ବିକାଶଶୀଳ ରାଷ୍ଟ୍ରଗୁଡ଼ିକର ଆର୍ଥିକ ଶକ୍ତିକୁ ମଜବୁତ କରିବା ପାଇଁ ସକ୍ଷମ ସମର୍ଥନ ପ୍ରଣାଳୀ ପ୍ରତିଷ୍ଠା କରିବା ଉଚିତ। ସେ ଆଇଏମଇସି ଧାରାରେ ଆଫ୍ରିକା, ଲାଟିନ୍ ଆମେରିକା ଏବଂ ପ୍ରଶାନ୍ତ ମହାସାଗରୀୟ ଦ୍ୱୀପପୁଞ୍ଜ ରାଷ୍ଟ୍ରଗୁଡ଼ିକୁ ଯୋଡିବା ପାଇଁ ସଂଯୋଗ ପ୍ରକଳ୍ପଗୁଡ଼ିକ ବିଷୟରେ ବିଚାର କରିବାକୁ ମଧ୍ୟ ଆହ୍ୱାନ କରିଥିଲେ। ଏହି ଦୃଷ୍ଟିକୋଣକୁ ସାକାର କରିବା ପାଇଁ, ପ୍ରଧାନମନ୍ତ୍ରୀ ଏକ 'ସଂଯୋଗ ଏବଂ ବାଣିଜ୍ୟ ପାଇଁ ଅନ୍ତର୍ଜାତୀୟ ଗତିଶୀଳତା ସହଭାଗୀତା' (ଇମ୍ପାକ୍ଟ) ସୃଷ୍ଟି କରିବାର ପ୍ରସ୍ତାବ ଦେଇଥିଲେ, ଯାହା ଜି୭ ପୁଞ୍ଜି, ଭାରତର ପ୍ରତିଭା ଏବଂ ବିଶ୍ୱ ଦକ୍ଷିଣର ମାଲିକାନାକୁ ଏକତ୍ର କରିବ।
ପ୍ରଧାନମନ୍ତ୍ରୀ ଏକ ସ୍ଥିର, ବିଶ୍ୱସ୍ତ ଏବଂ ସମୃଦ୍ଧ ବିଶ୍ୱ ଅର୍ଥନୀତି ପ୍ରତି ଭାରତର ପ୍ରତିବଦ୍ଧତାକୁ ପୁଣିଥରେ ଦୋହରାଇଥିଲେ। ଉଲ୍ଲେଖ କରିଥିଲେ ଯେ ସମନ୍ୱୟ, ସହଭାଗୀତା ଏବଂ ଭାଗୀଦାରୀ ପ୍ରଗତିରେ ଭାରତର ବିଶ୍ୱାସ ଏହାକୁ ଜି୭ ସଦସ୍ୟ ଏବଂ ଅନ୍ୟ ଦେଶ ସହିତ ବାଣିଜ୍ୟ ଚୁକ୍ତିନାମା କରିବାକୁ ପ୍ରେରଣା ଦେଇଛି।
ଫ୍ରାନ୍ସର ଏଭିୟନଠାରେ ଜି-୭ ଶିଖର ସମ୍ମିଳନୀ ଅବସରରେ ଆମେରିକା ରାଷ୍ଟ୍ରପତିଙ୍କୁ ଭେଟିଲେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୧୭ ଜୁନ୍ ୨୦୨୬ରେ ଫ୍ରାନ୍ସର ଏଭିୟନରେ ଅନୁଷ୍ଠିତ ଜି-୭ ଶିଖର ସମ୍ମିଳନୀ ଅବସରରେ ଯୁକ୍ତରାଷ୍ଟ୍ର ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିଛନ୍ତି।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ପଶ୍ଚିମ ଏସିଆରେ ଚାଲିଥିବା ସଂଘର୍ଷର ଅନ୍ତ ଘଟାଇବା ସହିତ ଏକ ବ୍ୟାପକ କ୍ଷେତ୍ରରେ ଶାନ୍ତି ଓ ସ୍ଥିରତା ଫେରାଇ ଆଣିବା ପାଇଁ ହୋଇଥିବା ଚୁକ୍ତିରେ ରାଷ୍ଟ୍ରପତି ଟ୍ରମ୍ପଙ୍କ ପ୍ରୟାସକୁ ପ୍ରଶଂସା କରିଛନ୍ତି । ସେ ହର୍ମୁଜ୍ ପ୍ରଣାଳୀରେ ମୁକ୍ତ ନୌପରିବହନ ଏବଂ ବାଧାମୁକ୍ତ ବାଣିଜ୍ୟ ବଜାୟ ରଖିବା ତଥା ନାବିକମାନଙ୍କ ସୁରକ୍ଷା ସୁନିଶ୍ଚିତ କରିବାର ଆବଶ୍ୟକତା ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି ।
ଦୁଇ ନେତା ଫେବୃଆରୀ ୨୦୨୫ରେ ୱାଶିଂଟନ ଡି.ସି.ରେ ହୋଇଥିବା ସାକ୍ଷାତ ପରଠାରୁ ଭାରତ-ଆମେରିକା କମ୍ପାକ୍ଟ (କମ୍ପାକ୍ଟ: କ୍ୟାଟଲାଇଜିଂ ଅପର୍ଚୁନିଟିଜ୍ ଫର୍ ମିଲିଟ୍ରି ପାର୍ଟନରଶିପ୍, ଏକ୍ସେଲରେଟେଡ୍ କମର୍ସ ଏଣ୍ଡ ଟେକ୍ନୋଲୋଜି) ଅଧୀନରେ ହୋଇଥିବା ଗୁରୁତ୍ୱପୂର୍ଣ୍ଣ ପ୍ରଗତିର ସମୀକ୍ଷା କରିଥିଲେ। ସେମାନେ ପ୍ରତିରକ୍ଷା, ରଣନୀତିକ ପ୍ରଯୁକ୍ତିବିଦ୍ୟା, ଶକ୍ତି ଏବଂ ଦ୍ୱିପାକ୍ଷିକ ବାଣିଜ୍ୟ କ୍ଷେତ୍ରରେ ପ୍ରମୁଖ ଅଗ୍ରଗତିକୁ ସ୍ୱାଗତ କରିଥିଲେ।
ଏକ ମଧ୍ୟବର୍ତ୍ତୀକାଳୀନ ଦ୍ୱିପାକ୍ଷିକ ବାଣିଜ୍ୟ ଚୁକ୍ତିନାମା ପାଇଁ ଆଲୋଚନାରେ ହୋଇଥିବା ଗୁରୁତ୍ୱପୂର୍ଣ୍ଣ ଅଗ୍ରଗତିକୁ ନେଇ ଦୁଇ ନେତା ବିଶେଷ ସନ୍ତୋଷ ପ୍ରକାଶ କରିଥିଲେ। ଏହାସହିତ, ଯଥାଶୀଘ୍ର ଏକ ସନ୍ତୁଳିତ, ପାରସ୍ପରିକ ଲାଭଦାୟକ ଏବଂ ବାଣିଜ୍ୟିକ ଭାବରେ ଅର୍ଥପୂର୍ଣ୍ଣ ଚୁକ୍ତିନାମା ପାଇଁ କାର୍ଯ୍ୟ କରିବାକୁ ସେମାନଙ୍କର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଏହି କ୍ରମରେ, ଆମେରିକାର ବାଣିଜ୍ୟ ପ୍ରତିନିଧି ଶ୍ରୀ ଜେମସନ ଗ୍ରୀୟର ଆସନ୍ତା ସପ୍ତାହରେ ଭାରତ ଗସ୍ତ କରିବେ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ଆମେରିକା ରାଷ୍ଟ୍ରପତି ଟ୍ରମ୍ପ ଭାରତ-ଆମେରିକା ବ୍ୟାପକ ବିଶ୍ୱ ରଣନୀତିକ ସହଭାଗୀତାକୁ ଆହୁରି ସୁଦୃଢ଼ କରିବା ଏବଂ ଉଭୟ ଦେଶ ଓ ସେମାନଙ୍କର ଲୋକଙ୍କ ପାରସ୍ପରିକ ଲାଭ ପାଇଁ ସମସ୍ତ କ୍ଷେତ୍ରରେ ସହଯୋଗକୁ ଆଗକୁ ବଢ଼ାଇବା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ
